कोरोना संक्रमणको असहज परिस्थितिका कारण एवं साउदी अरबमा आफ्नो करार अवधि पूरा गरी आजबाट क्रमशः स्वदेश फर्किन लाग्नुभएको छ । कोरोना संक्रमणका महामारीका समयमा धेरै दुःख कष्ट सहेर धैर्यतापूर्वक स्वदेश फर्किने दिनको प्रतिक्षामा बस्नुभएकोमा यहाँहरुप्रति नेपाली राजदूतावास धन्यवाद दिन चाहन्छ । आगामी दिनहरुमा पनि दाजुभाइ दिदीबहिनीहरु पनि क्रमशः स्वदेश फर्किने क्रममा हुनुहुन्छ । संक्रमणको महामारीका समयमा नेपाली राजदूतावासको सीमित स्रोत र साधनका बावजुत हजारौँको संख्यामा नेपाली दाजुभाइ तथा दिदीबहिनीहरुलाई प्रत्यक्ष सेवा प्रदान गर्न पाएकामा नेपाली राजदूतावास खुसी छ ।
विभिन्न अवधिको विदेश बसाईका क्रममा यहाँहरुले वैदेशिक रोजगारीका तीता मीठा र अफ्ठ्याराहरु झेल्दै लामो अनुभव हासिल गर्नुभएको छ । स्वदेश फकर्न लाग्नुभएका यहाँहरुले हाँसिल गरेको ज्ञान, सीप, अनुभव र पूँजीबाट मुलुकले धेरै अपेक्षा गरेको छ ।
नेपाल सरकारले कृषि क्षेत्रको आमूल विकास गरी कृषि उत्पादनको आयात माथिको नर्भरतालाई कम गर्दै जाने लक्ष्य लिएको छ । विदेशबाट फर्किने जनशक्तिलाई लक्षित गरेर सरकारले कृषिक्षेत्रको विकासका कार्यक्रम ल्याएको छ । कृषिक्षेत्रको विकासमा अतिरिक्त रोजगारी सिर्जनाका अन्य क्षेत्रलाई समेत सरकारले महत्वका साथ समेटेको छ । कृषि क्षेत्रको सुधार अन्तर्गत लगानीमा प्रोत्साहन, प्रधानमन्त्री कृषि आधुनिकीकरण परियोजना, कृषि तथा पशु व्यवसायमा अनुदान, निशुल्क कृषि तालिम, वीमाको भरपर्दो व्यवस्था कृषि क्षेत्रमा प्रवाह हुने ऋणको व्याजमा भारी सहुलियत, कृषि उपजको अग्रिम मूल्य निर्धारण, उत्पादनमा सहुलियत लगायत दर्जनौँ उत्प्रेरणात्मक र व्यवहारिक कार्यक्रमहरु ल्याएको छ । देशको थुप्रै उर्वर भूमि वर्षौंदेखि उत्पादनहीन् अवस्थामा रहेको छ । मुलुकलाई चाहिने महत्वपूर्ण श्रम शक्ति मुलुक बाहिरको रोजगारीमा रहेको हुँदा यो क्षेत्र ओझेलमा परेको छ । स्थानीय स्तरमा समेत रोजगारीका अवसर सृजना गरी देश विकासमा महत्वपूर्ण भूमिका निर्वाह गर्ने युवा जनशक्ति मुलुकको विकासमा प्रत्यक्ष संलग्नता आवश्यक रहेको छ । कोरोना संक्रमणको जटील परिस्थितिले यो अवसर जुटाइदिएको छ ।
तसर्थ, तपाइँहरुको वैदेशिक रोजगारीको अनुभव समेतका माध्यमबाट व्यवसायिक कृषि तथा पशुपालन, स्थानीय स्तरमा रोजगारी सृजनाका अन्य उपायहरु तथा स्थानीय स्तरमा सामाजिक र आर्थिक पूंजी परिचालन गरी राष्ट्रिय अर्थतन्त्रमा टेवा पुर्याउन सकिने भएको हुँदा संगठित वा व्यक्तिगतरुपमा अगाडि आएर यो क्षेत्रमा कृयाशील रहन नेपाली राजदूतावास यहाँहरुलाई अनुरोध गर्दछ । साउदी अरबमा रहेर पनि कतिपय यहाँहरुले मुलुकमा कृषि तथा पशुपालन र रोजगारीका अन्य क्षेत्रमा संगठित लगानीको शुरुवात गरिसक्नुभएको छ ।
वैदेशिक रोजगारीबाट फर्केकाहरुले आफ्नो घरपरिवार, समाज र समग्र मुलुकका लागि आसा र भरोसा जगाउँदै मुलुकको विकासमा महत्वपूर्ण योगदान गर्नुहुनेछ भन्ने पूर्ण विश्वासका साथ आज स्वदेश फर्कने र फर्कन पर्खाइमा रहनुभएका सबैमा शुभकामना ।
नेपाली राजदूतावास, रियाद ।
२०७७/३/४
